തമിഴ് സൂപ്പര്‍ സ്റ്റാര്‍ ശരത്കുമാര്‍ മലയാളത്തില്‍ നായകവേഷത്തില്‍ അഭിയനിക്കുന്നു. പഴശ്ശിരാജയിലെ ഇടച്ചേന കുങ്കനെ അവതരിപ്പിച്ച് മലയാളിപ്രേക്ഷകരുടെ മനംകവര്‍ന്ന ശരത് കുമാര്‍ മലയാളത്തില്‍ തന്റെ അഭിനയശേഷി കാഴ്ച വയ്ക്കാന്‍ ഒരുങ്ങുകയാണ്. അടുത്ത രണ്ട് സിനിമകളില്‍ സഹനടന്റെ റോളാണ് കൈകാര്യം ചെയ്യുന്നതെങ്കിലും മെട്രോ എന്ന പുതിയ സിനിമയില്‍ നായകവേഷത്തില്‍ എത്തുകയാണ്. വ്യാസന്‍ എടവനക്കാട് എന്ന പുതുമുഖമാണ് ചിത്രം സംവിധാനം ചെയ്യുന്നത്. ദിലീപിന്റെ വിശ്വസ്തരില്‍ ഒരാളാണ് വ്യാസന്‍ എടവനക്കാട്.് ഗ്രാന്റ് പ്രൊഡക്ഷന്‍സിന്റെ ബാനറില്‍ ദിലീപാണ് ചിത്രം നിര്‍മ്മിക്കുന്നത്. ശരത് കുമാര്‍ ചിത്രത്തില്‍ പോലീസ് ഓഫീസറുടെ വേഷത്തിലാണ് പ്രത്യക്ഷപ്പെടുന്നത്. മറ്റും അഞ്ച് യുവനടന്മാരും പ്രധാനവേഷത്തില്‍ അഭിനയിക്കുന്നുണ്ട്. കുറ്റാന്വേഷണകഥ പറയുന്ന ചിത്രത്തിന്റെ തിരക്കഥ കൊച്ചിയില്‍ ഒരുങ്ങുകയാണ്.

ഉലകനായകന്‍ കമലഹാസന്‍ 22 വര്‍ഷത്തിനുശേഷം മലയാളത്തില്‍ വീണ്ടും എത്തുന്നു. മുളകുപാടം ഫിലീംസിന്റെ ബാനറില്‍ ടോമിച്ചന്‍ മുളകുപാടം നിര്‍മ്മിക്കുന്ന ഫോര്‍ ഫ്രണ്ട്‌സിലാണ് കമലഹാസനായി തന്നെ കമല്‍ എത്തുന്നത്. ടി.കെ. രാജീവ് കുമാറിന്റെ ചാണക്യനിലാണ് കമലഹാസന്‍ ഇതിനുമുമ്പ് മലയാളത്തില്‍ അഭിനയിച്ചത്. ഇവര്‍ വിവാഹിതരായാല്‍, ഹാപ്പി ഹസ്ബന്‍ഡ്‌സ് എന്നീ ചിത്രങ്ങള്‍ക്കുശേഷം സജി സുരേന്ദ്രന്‍-കൃഷ്ണ പൂജപ്പുര ടീം ഒത്തുചേരുന്ന ഫോര്‍ ഫ്രണ്ട്‌സ് ചിത്രീകരണം ആലപ്പുഴയില്‍ പുരോഗമിക്കുന്നു. മറ്റൊരു പ്രധാന ലൊക്കേഷന്‍ മലേഷ്യയാണ്. ജയാറാം, കുഞ്ചാക്കോ, ജയസൂര്യ, മീരാജാസ്മിന്‍ എന്നിവരാണ് മറ്റു പ്രധാന അഭിനേതാക്കള്‍. കൈതപ്രത്തിന്റെ ഗാനങ്ങള്‍ക്ക് എം. ജയചന്ദ്രന്‍ ഈണം പകരുന്നു. അനില്‍ നായര്‍ ഛായാഗ്രഹണം.

രണ്ടുവര്‍ഷത്തെ ഇടവേളയ്ക്കുശേഷം മലയാളത്തില്‍ തിരിച്ചെത്തിയ മീരാജാസ്മിന്റെ പുതിയ ചിത്രമായ പാട്ടിന്റെ പാലാഴി ഓണചിത്രങ്ങളില്‍ തിയേറ്ററുകള്‍ മനംകുളിര്‍പ്പിച്ച് ഓടുന്നു. കമലിന്റെ മിന്നാമിന്നിക്കൂട്ടത്തിലാണ് മീര അവസാനമായി മലയാളത്തില്‍ അഭിനയിച്ചിരുന്നത്. മലയാളികള്‍ക്ക് എന്നും മനസ്സില്‍ സൂക്ഷിക്കാവുന്ന ഒരു കഥാപാത്രമാണ് പാട്ടിന്റെ പാലാഴിയില്‍ മീര കാഴ്ചവയ്ക്കുന്നത്. അതുതന്നെയാണ് മീരയും ആഗ്രഹിച്ചത്. മടങ്ങിവരവ് ഗംഭീരമായിരിക്കണം. അതുതന്നെ സംഭവിച്ചു. പിന്നണി ഗായികയാകാന്‍ മോഹിക്കുന്ന വീണ എന്ന തമിഴ് ബ്രാഹ്മണ പെണ്‍കുട്ടിയുടെ ജീവിതത്തിലൂടെയാണ് പാട്ടിന്റെ പാലാഴിയുടെ കഥ ഒഴുകുന്നത്. കാമുകിയും ഭാര്യയും അമ്മയുമൊക്കെയായി പ്രേക്ഷകന്റെ മനോമുകുരത്തെ തൊട്ടുണര്‍ത്തുന്നു മീര. രാജീവ് അഞ്ജല്‍ തിരക്കഥയെഴുതി സംവിധാനം ചെയ്ത ചിത്രത്തില്‍ ഒഎന്‍വിയുടെ വരികള്‍ക്ക് ഡോ. സുരേഷ് മണിമല സംഗീതം ഒരുക്കിയിരിക്കുന്നു. രേവതി, മനോജ്. കെ. ജയന്‍, നെടുമുടി, ജഗതി എന്നിവര്‍ പ്രധാനപ്പെട്ട മറ്റു കഥാപാത്രങ്ങളെ അവതരിപ്പിച്ചു.

പൂരം ഫിലീംസിന്റെ ബാനറില്‍ അനീസ് നിര്‍മ്മിച്ച് സുരേഷ് കൃഷ്ണന്‍ സംവിധാനം ചെയ്യുന്ന 'പതിനൊന്നില്‍ വ്യാഴം' പ്രദര്‍ശനത്തിന് തയ്യാറായി. ഊട്ടിയുടെ പശ്ചാത്തലത്തിലുള്ള കഥയാണ് പതിനൊന്നില്‍ വ്യാഴം. മുകേഷ്, ജഗതി, മന്യ, നെടുമുടി വേണു, സാദിഖ്, ഷാജു, ശ്രീലേഖ തുടങ്ങിയവര്‍ ഈ ചിത്രത്തില്‍ അണിനിരക്കുന്നുണ്ട്. ഗിരിജാ സേതുവിന്റെ കഥ, മഹേഷ് മിത്രയുടെ സംഗീതം, കെ.പി. നമ്പ്യാതിരി ഛായാഗ്രഹണം നിര്‍വ്വഹിക്കുന്നു.

ശ്രീനിവാസന്‍, കുഞ്ചാക്കോ ബോബന്‍, വിനീത് ശ്രീനിവാസന്‍, ആസിഫ് അലി എന്നിവരെ പ്രധാന കഥാപാത്രങ്ങളാക്കി രാജേഷ് പിള്ള സംവിധാനം ചെയ്യുന്ന ചിത്രമാണ് 'ട്രാഫിക്'. മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫന്‍ നിര്‍മ്മിക്കുന്ന ഈ ചിത്രത്തില്‍ പത്മപ്രിയ, സന്ധ്യ, റോമ, രമ്യനമ്പീശന്‍ എന്നിവര്‍ നായികമാരാകുന്നു. അനൂപ് മേനോന്‍, നാസര്‍, പ്രേംകുമാര്‍, വിജയകുമാര്‍, സുദീപ് ജോഷ് തുടങ്ങിയവരോടൊപ്പം പുതുമുഖതാരങ്ങളും അഭിനയിക്കുന്നു. ജോസ് പ്രകാശ് അതിഥി താരമായി എത്തുന്നു. സഞ്ജയ്-ബോബി തിരക്കഥയും സംഭാഷണവുമെഴുതുന്ന ചിത്രത്തിന്റെ ഛായാഗ്രഹണം ഷൈജു ഖാലിദ് നിര്‍വ്വഹിക്കുന്നു. ഗാനരചന: വയലാര്‍ ശരത് ചന്ദ്രവര്‍മ്മ, സംഗീതം മെജോ ജോസഫും, സാംസണ്‍കോട്ടുരും.

സംവിധായകന്‍ ഷാഫി പരീക്ഷണാര്‍ത്ഥം തന്റെ സിനിമയ്ക്ക് പുതിയ രീതിയില്‍ പേര് നല്‍കി. 'മേരിക്കുണ്ടൊരു കുഞ്ഞാട്' എന്നാണ് ദിലീപിനെ വച്ച് ചെയ്യുന്ന പുതിയ ചിത്രത്തിന്റെ പേര്. ആക്ഷേപഹാസ്യത്തിലാണ് സിനിമയുടെ കഥ പറയുന്നത്. ഹാസ്യതാരങ്ങളായ സുരാജ്, ജഗതി, ഇന്നസെന്റ്, സലീംകുമാര്‍ എന്നിവരെ അണിനിരത്തിയാണ് ചിത്രം ഒരുക്കുന്നത്. ബെന്നി-ഇഗ്നീഷ്യസ് സംഗീതം, ക്യാമറ ശ്യാം ദത്ത്, തിരക്കഥ ബെന്നി നായരമ്പലം.