ദേശീയ അവാര്‍ഡ് ജേതാവായ വി.കെ പ്രകാശിന്റെ പുതിയ ചിത്രത്തില്‍ ഇന്ദ്രജിത്ത് നായകനാകുന്നു. ഷേക്‌സ്പിയറിന്റെ ഹാംലെറ്റിനെ ആധാരമാക്കി എടുക്കുന്ന ഈ ചിത്രത്തിന്റെ തിരക്കഥ യൊരുക്കുന്നത് ബല്‍റാം മട്ടന്നൂരാണ്. ദേശീയ പുരസ്‌കാരം നേടിയ 'കളിയാട്ടം' എന്ന ചിത്രത്തിന്റെ തിരക്കഥാകൃത്താണ് ബല്‍റാം മട്ടന്നൂര്‍. സെപ്തംബര്‍ മധ്യത്തോടെ ചിത്രീകരണം ആരംഭിക്കുമെന്നാണ് സൂചന.

അന്തരിച്ച നടന്‍ കരമന ജനാര്‍ദ്ദന്‍ നായരുടെ മകന്‍ സുധീര്‍ കരമനയും ഈ ചിത്രത്തില്‍ സുപ്രധാന വേഷം ചെയ്യുന്നുണ്ട്. വി.ശക പ്രകാശ് അടുത്തകാലത്തിറക്കിയ ആദ്യ കൊമോഴ്‌സ്യല്‍ ചിത്രമായ 'ഗുലുമാല്‍ ദ എസ്‌കേപ്പ്' വിജയമായിരുന്നില്ല. അമ്പതു ദിവസം മാത്രമാണ് ചിത്രം തീയേറ്റുകളില്‍ പിടിച്ചുനിന്നത്. എങ്കിലും കുഞ്ചാക്കോ ബോബന് ഒരു തിരിച്ചുവരവ് നല്‍കാന്‍ ചിത്രത്തിനു കഴിഞ്ഞു എന്നു പറയേണ്ടിയിരിക്കുന്നു.

ശിക്കാറിലെ തന്റെ ഞെട്ടിക്കുന്ന പ്രകടനത്തിനുശേഷം അനന്യ കണ്ഡഹാറിന്റെ സെറ്റില്‍ എത്തുന്നു. ചിത്രത്തില്‍ പ്രധാനപ്പെട്ട ഒരു വേഷം അനന്യ ചെയ്യുന്നുണ്ട്. നാടോടികള്‍ എന്ന സിനിമയിലൂടെ പ്രശസ്തിയായ അനന്യ ശിക്കാര്‍ എന്ന മോഹന്‍ലാല്‍ സിനിമയില്‍ മോഹന്‍ലാലിനെപ്പോലും അമ്പരിപ്പിച്ചുകൊണ്ട് സാഹസികമായ ഒരു രംഗം ഡ്യൂപ്പിന്റെ സഹായമില്ലാതെ സ്വയം ചെയ്ത് സെറ്റിലെ മുഴുവന്‍ അണിയറപ്രവര്‍ത്തകരെയും ഞെട്ടിച്ച പ്രകടനം കാഴ്ചവച്ചിരുന്നു. അമിതാഭ് ബച്ചന്‍, ഗണേഷ് വെങ്കട്ടരാമന്‍ തുടങ്ങിയ ഇന്ത്യന്‍ സിനിമയിലെ പ്രഗത്ഭതാരങ്ങള്‍ അണിനിരക്കുന്ന ചിത്രം 1999ല്‍ ഭീകരര്‍ റാഞ്ചികൊണ്ടുപോയ എയര്‍ ഇന്ത്യ വിമാന ഹൈജാക്കാണ് മുഖ്യപ്രമേയമായി അവതരിപ്പിക്കുന്നത്.