മലയാളസിനിമയും ബോളിവുഡിനെയും ഹോളിവുഡിനെയും കിടപിടിക്കാന്‍ ഒരുങ്ങുകയാണെന്ന് തോന്നുന്നു. മലയാളത്തില്‍ ഈയിടെയായി ബിഗ്ബഡ്ജറ്റ് സിനിമകള്‍ ധാരാളമായി ഇറങ്ങിക്കൊണ്ടിരിക്കുകയാണ്. കോടികളാണ് ചിലവഴിക്കാന്‍ തുടങ്ങിയിരിക്കുന്നത്. മുമ്പൊക്കെ മലയാളസിനിമ ലക്ഷങ്ങളില്‍ വട്ടമിട്ടുകളിക്കുകയായിരുന്നു. അതും കേരളത്തിലെ ഗ്രാമീണ പശ്ചാത്തലത്തിനൊപ്പിച്ചുള്ള കഥയും നിര്‍മ്മാണവും. എന്നാല്‍ ഇപ്പോള്‍ സ്ഥിതി മാറിയിരിക്കുന്നു. പണമിറക്കാന്‍ എന്‍ആര്‍ഐകളും ബിസിനസ്സ് ടൈക്കൂണുകളും ക്യൂ നില്ക്കുന്നു. അതുകൊണ്ടുതന്നെ സിനിമ പിടിക്കുമ്പോള്‍ ബോളിവുഡിനെയും ഹോളിവുഡിനെയും മനസ്സില്‍ കണ്ട് എല്ലാവിധ സാങ്കേതികവിദ്യയും പ്രയോജനപ്പെടുത്തി, പോരാത്തതിനു വിദേശരാജ്യങ്ങളില്‍ ചിത്രീകരണം നടത്തുകയും അവിടുത്തെ സ്റ്റുഡിയോകളില്‍ പ്രീപ്രൊഡക്ഷന്‍ വര്‍ക്കുകള്‍ നടത്തുകയും ചെയ്യുക. മൊത്തത്തില്‍ ഒരു ഹോളിവുഡ് സ്‌റ്റൈല്‍ സിനിമയുടെ രൂപവും ഭാവവും. ഈ ഒരു പരിസ്ഥിതിയിലാണ് ഹോളിവുഡ് ഹിറ്റായ ഡ്രാക്കുളയുടെ മലയാളസിനിമ രംഗത്തെത്തുന്നത്. അതും 3ഡിയില്‍. സിനിമ നിര്‍മ്മിക്കുന്നത് ഫ്രയിം ഫിലീം കമ്പനിയാണ്. സംവിധാനം രൂപേഷ് പോളും. ഐ-മാക്‌സ് 3ഡി ഫ്യൂഷന്‍ എന്ന അതിനൂതന സാങ്കേതികത്വമാണ് ഈ സിനിമയ്ക്കുവേണ്ടി ഉപയോഗിക്കുന്നത്. ഈയിടെ ഇറങ്ങിയ ലോകഹിറ്റ് സിനിമയായ അവതാറിന് ഇതേ സാങ്കേതികവിദ്യയില്‍ നിര്‍മ്മിച്ചതാണ്. അണിയറയില്‍ ഇന്ത്യയിലേയും വിദേശത്തെയും ആര്‍ട്ടിസ്റ്റുകള്‍ അണിനിരക്കുന്നു. ബ്രിട്ടനിലെ ആന്റോണിയോ റിവേറിയോ ആണ് ഛായാഗ്രഹണം നിര്‍വ്വഹിക്കുന്നത്. കെ. ജയകുമാര്‍, റഫീഖ് അഹമ്മദ് എന്നിവരുടെ വരികള്‍ക്ക് ശ്രീവല്‍സന്‍ ജെ. മേനോന്‍ സംഗീതം നല്‍കുന്നു. 10 കോടി രൂപ മുതല്‍ മുടക്കില്‍ സിനിമ നിര്‍മ്മിക്കുന്നത് പ്രേമന്‍ പോത്തന്‍-സഞ്ജീവ് മേനോന്‍ ടീമാണ്.

സിനിമാപ്രക്ഷകര്‍, പ്രത്യേകിച്ച് പൃഥ്വിരാജിന്റെ ആരാധകവൃന്ദം കാത്തിരിക്കുന്ന 'അന്‍വര്‍' ഒക്ടോബറില്‍ പ്രദര്‍ശനത്തിനെത്തുന്നു. മതതീവ്രവാദത്തിന്റെ കഥപറയുന്ന സിനിമയുടെ സംവിധായകന്‍ അമല്‍ നീരദ് ആണ്. ആദ്യം ജൂലായില്‍ റിലീസ് ചെയ്യാന്‍ ഉദ്ദേശിച്ചെങ്കിലും പിന്നീട് റംസാന്‍ റിലീസായി ഒരുക്കിയ സിനിമയുടെ പോസ്റ്റ് പ്രൊഡക്ഷന്‍ വര്‍ക്കുകള്‍ വീണ്ടും നീണ്ടതാണ് റിലീസിങ്ങ് തീയതി ഒക്ടോബറിലേക്ക് മാറ്റാന്‍ കാരണമെന്ന് സിനിമയുടെ പ്രൊഡ്യൂസര്‍ റെഡ് കാര്‍പ്പറ്റ്‌സ് അറിയിച്ചു. മംമ്താ മോഹന്‍ദാസും പ്രകാശ് രാജുമാണ് മറ്റു രണ്ട് പ്രധാനപ്പെട്ട അഭിനേതാക്കള്‍. അവതാര്‍ പോലെ പൃഥ്വിയുടെ മറ്റൊരു അവതാരമായിരിക്കും ഈ സിനിമയില്‍.

നിറക്കാഴ്ചയ്ക്കുശേഷം പുതുമുഖസംവിധായകന്‍ അനീഷ് തന്റെ രണ്ടാമത്തെ സിനിമയുടെ പണിപ്പുരയിലാണ്. നിറക്കാഴ്ച സിനിമാലോകത്ത് കൂടുതല്‍ ചര്‍ച്ച ചെയ്യപ്പെടാതെ പോയ സിനിമയാണ്. എങ്കിലും തന്റെ സിനിമാഭിനിവേശം ഒട്ടും കുറയാതെ തന്നെയാണ് അനീഷ് തന്റെ രണ്ടാമത്തെ ചിത്രത്തിന് ഒരുങ്ങുന്നത്. ഇറ്റാലിയന്‍ അഭിനേതാവ് വിന്‍സെന്‍സോ ബോസിറേലിയാണ് ചിത്രത്തിലെ മുഖ്യകഥാപാത്രത്തെ അവതരിപ്പിക്കുന്നത്. നായിക മറ്റാരുമല്ല നാഷണല്‍ അവാര്‍ഡ് ജേതാവ് കൂടിയായ പ്രിയാമണി തന്നെ. ചിത്രത്തിന്റെ പകുതിഭാഗവും ചിത്രീകരിക്കുക ഇറ്റലിയില്‍ വച്ചായിരിക്കും. ഷൂട്ടിങ്ങ് അടുത്ത ജനുവരിയില്‍ ആരംഭിക്കും. നിറക്കാഴ്ച മലയാളത്തില്‍ അത്ര ജനശ്രദ്ധ കിട്ടിയില്ലെങ്കിലും ചിത്രം ഇറ്റാലിയന്‍ ഭാഷയിലേക്ക് മൊഴിമാറ്റം നടത്തി 600 ഓളം തിയേറ്ററുകളില്‍ ഇറ്റലിയിലും കൂടാതെ ടിവി ചാനലുകളിലും പ്രദര്‍ശിപ്പിക്കാനുള്ള തയ്യാറെടുപ്പിലാണ്.

സാജു കൊടിയനും ഹരിശ്രീ മാര്‍ട്ടിനും ചേര്‍ന്നു രചിച്ച ഫോര്‍ ഇഡിയറ്റ് മലയാളസിനിമയിലെ ആദ്യ മുഴുനീള കോമഡി സിനിമയെന്ന പേരില്‍ അറിയപ്പെടും. രണ്ടുപേരും ഒന്നിച്ചഭിനയിക്കുന്ന ചിത്രത്തില്‍ ഹരിശ്രീ രാധകൃഷ്ണനും വിനോദ് കോവൂറും പ്രധാനപ്പെട്ട വേഷത്തില്‍ സിനിമയില്‍ എത്തുന്നു. സിനിമ സംവിധാനം ചെയ്യുന്നത് കെ.എം. പ്രദീഷാണ്. ഹാസ്യരംഗങ്ങളാല്‍ പൊട്ടിച്ചിരിയുടെ മാലപ്പടക്കത്തിനാണ് ഹരിശ്രീ മാര്‍ട്ടിനും സാജു കൊടിയനും തങ്ങളുടെ ആദ്യതിരക്കഥയില്‍ മരുന്ന് നിറച്ചിരിക്കുന്നത്. ഇവരെ കൂടാതെ കലാഭവന്‍ മണി, സുരാജ്, ജഗതി ശ്രീകുമാര്‍, ജഗദീഷ്, സലീം കുമാര്‍ എന്നിവരും അണിനിരക്കുന്നു മറ്റു വേഷങ്ങളില്‍. പുത്തന്‍ സാങ്കേതകവിദ്യയിലുള്ള റെഡ്-1 ക്യാമറയാണ് ചിത്രത്തിന്റെ ഷൂട്ടിങ്ങിനുവേണ്ടി ഉപയോഗിക്കുന്നത്.

പ്രശസ്തനടി ഷീല വീണ്ടും മലയാളസിനിമയില്‍ സജീവമാകുന്നു. ഇത്തവണ കുട്ടിഭൂതത്തിലൂടെയാണ് ഷീലയെത്തുന്നത്. മുഴുനീളഹാസ്യചിത്രമായ ഈ സിനിമയില്‍ മുകേഷ് നായകവേഷം ചെയ്യുന്നു. പുതുമുഖസംവിധായകന്‍ കുമാര്‍ നന്ദയാണ് ചിത്രം സംവിധാനം ചെയ്യുന്നത്. ഒരു കൂട്ടം കള്ളന്മാരുടെയും, മൂന്നു കുട്ടികളുടെയും തമാശക്കാരനായ പോലീസ് ഓഫീസറുടെയും കഥയാണ് ഈ സിനിമ. എലൈറ്റ് സിനി കമ്പയിന്‍സിന്റെ ബാനറില്‍ ലത്തീഫാണ് ചിത്രം നിര്‍മ്മിക്കുന്നത്. ചിത്രത്തിന്റെ നിര്‍മ്മാണം തലസ്ഥാനത്ത് നടന്നുകൊണ്ടിരിക്കുകയാണ്. അശോകന്‍, ജാഫര്‍ ഇടുക്കി, കലാഭവന്‍ ഹനീഫ്, ജഗതി, സുരാജ്, ജഗതീഷ്, മായ മൗഷ്മി എന്നിവരാണ് അഭിനേതാക്കള്‍. സംവിധായകന്‍ തന്നെയാണ് തിരക്കഥയും രചിച്ചിരിക്കുന്നത്.

പുതുമുഖ സംവിധായകന്‍ മധു കൈതപ്രം സംവിധാനം ചെയ്യുന്ന പുതിയ സിനിമയാണ് ഓര്‍മ്മ മാത്രം. ദിലീപാണ് നായകന്‍. റഹീം കടവത്തിന്റെ കഥയ്ക്ക് സി.വി. ബാലകൃഷ്ണന്‍ തിരക്കഥ രചിച്ചിരിക്കുന്നു. ഒക്ടോബറില്‍ സിനിമയുടെ ചിത്രീകരണം ആരംഭിക്കും. കൈതപ്രം ദാമോദരന്റെ വരികള്‍ക്ക് കൈതപ്രം വിശ്വനാഥന്‍ സംഗീതം നല്‍കിയിരിക്കുന്നു. എം.ജെ. രാധാകൃഷ്ണന്‍ ഛായാഗ്രഹണം. മധു കൈതപ്രത്തിന്റെ ആദ്യ രണ്ടു ചിത്രങ്ങളായ ഏകാന്തം, മധ്യവേനല്‍ എന്നീ ചിത്രങ്ങള്‍ക്കും ഇദ്ദേഹം തന്നെയാണ് ക്യാമറ ചലിപ്പിച്ചത്. ദിലിപ് ഇപ്പോള്‍ അഭിനയിച്ചുകൊണ്ടിരിക്കുന്ന കാര്യസ്ഥന്റെ ചിത്രീകരണം ഏകദേശം പൂര്‍ത്തിയായി വരികയാണ്.